د تخنیکي او مسلکي زده کړو ادارې مالي او اداري معاون د ملي آزموینو ادراې له سرپرست سره وکتل
د تخنیکي او مسلکي زده کړو ادارې مالي او اداري چارو معاون مفتي فضل الرحمن فاضل د آزموینو ملي ادارې له سرپرست شیخ عبدالباقي حقاني سره وکتل.
په دې کتنه کې د تخنیکي او مسلکي مرکزونو د ښوونکو د ګمارنې د ازموینې د اخیستلو په اړه خبرې وشوې.
د تخنيکي او مسلکي زده کړو ادراې د بشري سرچينو رئيس رفيع الله ثابت په دې اداره کې د خالي بستونو په اړه خبرې وکړې.
د ازموينو ملي ادارې سرپرست شيخ عبدالباقي حقاني وويل، چې یاده اداره په هېواد کې د ازموينو د ترسره کولو يوازنۍ قانوني مرجع ده.
نوموړي د مسلکي ښوونځیو او انسټیټونو د استادانو د ګمارنې د ازموینې د ترسره کولو په برخه کې د تخنیکي او مسلکي زده کړو له ادراې سره د همکارۍ ډاډ ورکړ.
شیخ عبدالباقي حقاني وویل: «د ملي ازموینو اداره د مسلکي ښوونکو او اداري کادرونو د جذبولو په برخه کې ښه تجربه لري، او د بېلابېلو څانګو لپاره د قوي سوالونو بانک په درلودلو سره کولای شي ټولې اصلي ازموینې په شفافیت سره مدیریت کړي.»
