د تخنیکي او مسلکي زده کړو ادارې له لوري د لومړي مقام ګټل!
تخنیکي او مسلکي زده کړو ادارې، د پوهنې او لوړو زده کړو وزارتونو سره په همغږي سره د "الماهر بالقرآن" په نوم د تلاوت سیالۍ ترسره کړه.
په یاد پروګرام کې د تخنیکي او مسلکي زده کړو ادارې، د لوړو زده کړو او پوهنې وزارتونو څخه لس تنه غوره حافظانو برخه اخیستې وه او سیالي یې وکړه.
د یادونې وړ ده چې په دې مراسمو کې د انرژۍ او اوبو وزیر محترم عبداللطیف منصور او د ازموینو ملي ادارې رئیس شیخ عبدالباقي حقاني په ګډون یو شمیر مقاماتو او د کابینې وزیرانو هم حضور درلود.
نوموړو د پروګرام په پرانیسته کې ویناوې وکړې او ټینګار یې وکړ چې دا ډول پروګرامونه د نیکمرغۍ او برکت سرچینه ده او باید د دغه پروګرامونو لمن لا نوره هم وغځول شي.
د "الماهر بالقرآن" سیالۍ په دویمه برخه کې، ګډونوالو د الهي کلام آیتونه په خوږه آوازونو تلاوت کړل، چې د هیواد د با تجربه استادانو او داورانو لخوا یې داوري او قضاوت وشو.
د دې سیالۍ د استادانو او داورانو د پریکړې پر بنسټ، د تخنیکي او مسلکي زده کړو ادارې څخه قاري احمد خالد لومړی مقام خپل کړ او همدارنګه د لوړو زده کړو وزارت څخه قاري نوید احمد او قاري عبدالمطلب دوهم او دریم مقام او د پوهنې وزارت څخه محمد اسماعیل څلورم مقام ترلاسه کړ.
په پای کې، د پروګرام ګډونکوونکو حافظانو ته ډالۍ او نغدي جوایز هم ورکړل شول، او مراسم د برکت دعایې په ویلو سره پای ته ورسیدل.
