د تخنیکي او مسلکي زده کړو ادارې د پنځه کلنې استراتیژۍ د پلي کولو پلان وړاندې کړ
د تخنیکي او مسلکي زده کړو ادارې د استراتیژۍ پلي کولو پلان، په یوه غونډه کې ددغې ادارې د رئیسانو او کارکوونکو په وړاندې د پلان او ستراتيژیکو همغږیو ریاست له لوري وړاندې شو.
د غونډې په پیل کې ښاغلي مولوي عبدالهادي مجاهد، د ادارې د مقام تخنیکي مشاور وینا وکړه او ویې ویل چې دا د خوشالۍ ځای دی چې د هېواد د پرمختګ او خلکو ته د خدمتونو وړاندې کولو زمینه برابره شوې ده.
همدارنګه ښاغلي مجاهد د تخنیکي او مسلکي زده کړو ادارې د استراتیژۍ د ارزښت په هکله خبرې وکړې او زیاته یې کړه چې ددغه پلان په پام کې نیولو پرته د ادارې چارې په ښه توګه پرمخ نه ځي.
نوموړي وویل، د تخنیکي او مسلکي زده کړو ادارې د استراتیژۍ د پلي کولو په پلان کې د ادارې ټولې موخې او پروګرامونه شامل دي، او د ادارې له کارکوونکو یې وغوښتل چې اداري چارې یې باید ددغه پلان پراساس ترسره کړي. ترڅو د افغانستان خلکو ته اغېزناک خدمتونه وړاندې کړي.
د دغه پروګرام په دوام کې ددغه ادارې د پلان او ستراتیژیکو همغږیو ریاست د متخصصیونو لکه هریو اظهارالحق حمیم، شفېع الله شینواري او عبدالله محمدي له خوا د ادارې د استراتيژۍ د پلي کولو پلان وړاندې کړل شو.
د تخنیکي او مسلکي زده کړو ادارې د استراتیژۍ پلي کولو پلان د چارو د انسجام، ښه والي، د خدمتونو کیفي او کمي سطحې لوړوالي په موخه د راتلونکو ۵ کلونو لپاره ترتیب او د ادارې د مشرتابه له لوري منظور شوی دی.
