د تخنیکي او مسلکي زدهکړو ادارې لخوا د نهادونو او خصوصي سکتور ستاینه
د تخنیکي او مسلکي زدهکړو ادارې په یوه ناسته کې، د هېواد یو شمېر نهادونو او خصوصي سکتور مسؤلین د ځانګړو زدهکړو د ملاتړ په برخه کې د همکارۍ له امله، وستایل او تقدیر کړل.
په دې غونډه کې د افغانستان.ا.ا یو شمېر مسؤلینو ګډون او وینا وکړه، چې له دغې جملې پکې د ملي ازموینو ادارې رئیس شیخ عبدالباقي حقاني، د کابل ولایت د علماوو شورا رئیس الحاج خلیفه دین محمد، او د اقتصاد وزارت معین ډاکټر عبداللطیف نظري شامل وو.
د ملي ازموینو ادارې رئیس د پرانیستونکې وینا پر مهال وویل، د دین ساتنه او خلکو ته خدمت کول د اسلامي حکومت له اساسي دندو څخه دي.
نوموړي زیاته کړه، هغه کسان چې د اسلام تر چتر لاندې خدمت کوي، د الله تعالی له لوري به ډېر اجر او ثواب تر لاسه کړي.
په همدې حال کې، د کابل ولایت د علماوو شورا رئیس هم په دې ناسته کې وویل، چې د انسان د پیدایښت موخه عبادت او د ځمکې آبادول دي، او مسلمانان باید په دې برخه کې مخکښ واوسي.
د اقتصاد وزارت معین هم په دې پروګرام کې د وینا پر مهال وویل، چې د تخنیکي او مسلکي زدهکړو اداره په هېواد کې له مهمو تعلیمي نهادونو څخه ده او د اقتصادي ځانبسیاینې او د هېواد د پرمختګ په برخه کې بنسټیز رول لري.
د پروګرام په پای کې، محترم مولوي غلام سعید احساس، د تخنیکي او مسلکي زدهکړو ادارې مرستیال او وارسي کوونکي، د ځانګړو زدهکړو او د اورېدنې او لېدنې له معلولیت لرونکو کسانو د ملاتړ په برخه کې د بېلابېلو نهادونو له هڅو او همکاریو مننه وکړه.
نوموړي ټینګار وکړ، چې دا مهال په هېواد کې د اورېدنې او لېدنې معلولیت لرونکو کسانو لپاره د مسلکي زدهکړو برابرول، د تخنیکي او مسلکي زدهکړو ادارې له اساسي دندو څخه ګڼل کېږي.
دا مهال، په هېواد کې نږدې ۳۰ د ځانګړو زدهکړو د روزنې مرکزونه د تخنیکي او مسلکي زدهکړو ادارې په چوکاټ کې فعالیت لري.
