د تخنيکي او مسلکي زده کړو ادارې سرپرست د ترانسپورت او هوايي چلند وزارت له وزیر سره وکتل
د تخنيکي او مسلکي زده کړو ادارې مشر مولوي غلام حيدر شهامت د ترانسپورت او هوايي چلند وزارت له وزیر الحاج ملا حميدالله اخندزاده سره وکتل.
په دې کتنه کې ښاغلي شهامت د تخنیکي او مسلکي زده کړو ادارې د کړنو او د دې ادارې د اهمیت په اړه خبرې وکړې.
ورپسې دواړو لورو د هوايي چلند د انسټیټوټ د ښوونیز نصاب د ستونزو په اړوند خبرې وکړې.
دغه راز د تخنيکي او مسلکي زده کړو ادارې مشر د ياد شوي وزارت په تشو بستونو کې د تخنيکي او مسلکي زده کړو د فارغانو د جذبولو په برخه کې د ترانسپورت او هوايي چلند له وزارت څخه د همکارۍ غوښتنه وکړه.
د ترانسپورت او هوایي چلند وزارت وزیر الحاج ملا حميدالله آخندزاده د تخنيکي او مسلکي زده کړو له ادارې سره د یاد وزارت د همکاريو په اړه ډاډ ورکړ او ويې ويل، چې د تخنيکي او مسلکي زده کړو د مرکزونو د فارغانو ګمارنې ته به ځانګړې پاملرنه وکړي.
