د تخار په تخنيکي انسټیټوټ کې لنډ مهاله حرفوي کورسونه پيل شول
د تخار په تخنيکي او مسلکي انسټیټوټ کې د موبايلونو د ترميم او خياطۍ په څانګو کې حرفوي لنډ مهاله روزنيز کورسونه په لاره واچول شول.
د تخار ولايت تخنيکي او مسلکي زده کړو آمر انجنير محمد ايفل مبارز وايي، چې د يادو کورسونو له پرانيستلو يې موخه ځوانانو ته د کار زمينه برابرول دي.
د هغه په وينا، د حرفوي کورسونو په زده کړو سره ځوانان کولاى شي، چې کار پيدا کړي او خپلې اقتصادي ستونزې هوارې کړي.
د لنډ مهاله حرفوي کورسونو د پرانستلو په مراسمو کې د تخار ولایت تخنیکي او مسلکي زده کړو آمریت او د اطلاعاتو او فرهنګ ریاست ترمنځ د همکارۍ یو هوکړه لیک لاسلیک شو.
د دغه هوکړه لیک پر بنسټ به د تخار ولایت تخنیکي او مسلکي زده کړو آمریت او د اطلاعاتو او فرهنګ ریاست له یو بل سره د لنډ مهاله کورسونو په جوړولو کې همکاري وکړي.
