ختیځو ولایتونو ته د تخنیکي او مسلکي زده کړو ادارې د مشرتابه د سفر پای
د تخنیکي او مسلکي زده کړو ادارې پلاوي سفر ختیځ ولایتونو کونړ، ننګرهار او لغمان ته د محترم الحاج مولوي غلام حیدر شهامت په مشرۍ پای ته ورسید.
دې ولایتونو ته د سفر موخه د تخنیکي او مسلکي زده کړو ادارې د ادارې او مدیریت روزنیز پروګرام څخه د نږدې ۵۰۰۰ مجاهدینو په فراغت مراسمو کې ګډون او د دغې ادارې د مرکزونو له وضعیت څخه کتنه وه.
محترم مولوي غلام حیدر شهامت د کونړ ولایت د مجاهدینو فراغت په مراسمو کې چې یو شمیر سیمه ایزو چارواکو او عالمانو هم پکې ګډون کړی وو، وینا وکړه.
نوموړي په دې غونډه کې ټینګار وکړ چې د تخنیکي او مسلکي زده کړو ادارې لخوا د مجاهدینو لپاره د ادارې او مدیریت روزنیز پروګرام ترسره کول د افغانستان.ا.ا له لویو لاسته راوړنو څخه دی.
همدارنګه، محترم مولوي شهامت زیاته کړه چې د افغانستان.ا.ا رهبرۍ د مجاهدینو د دغه روزنیز پروګرام له پلي کیدو څخه هرکلی او له دې پروګرام څخه یې د هر اړخیز ملاتړ ډاډ ورکړی.
په ورته وخت کې، د کنړ ولایت د علماوو شورا رئیس د تخنیکي او مسلکي زده کړو ادارې مشرتابه ته د مجاهدینو لپاره د روزنیزو فرصتونو د برابرولو له امله مننه او قدرداني وکړ.
د دې سفر په دوام کې، ښاغلی مولوي شهامت او ورسره یې مل پلاوی ننګرهار ولایت ته لاړ، چیرې چې دوی د ادارې او مدیریت روزنیز پروګرام څخه د مجاهدینو د فراغت په مراسمو کې ګډون او وینا وکړه.
د دې سفر په پای کې، د تخنیکي او مسلکي زده کړو ادارې مشر الحاج مولوي غلام حیدر شهامت لغمان ولایت ته لاړ او د ادارې او مدیریت روزنیز پروګرام څخه د مجاهدینو په فراغت مراسمو کې یې ګډون او وینا وکړه.
د تخنیکي او مسلکي زده کړو رئیس په لغمان ولایت کې د خبرو پر مهال وویل چې د تخنیکي او مسلکي زده کړو ادارې په ټول هیواد کې شاوخوا ۴۰۰۰۰ مجاهدین د ادارې او مدیریت په روزنیز پروګرام کې جذب کړي دي، چې ډیری یې فارغ او په مختلفو ادارو کې په کار بوخت دي.
په ورته وخت کې، د لغمان ولایتي علماوو شورا رئیس د تخنیکي او مسلکي زده کړو ادارې له مشرتابه څخه د مجاهدینو لپاره د روزنیزو فرصتونو د برابرولو له کبله مننه وکړه.
له بلې خوا، د ادارې او مدیریت روزنیز پروګرام څخه یو فارغ مجاهد چې د مجاهدینو په استازیتوب یې خبرې کولې، وویل چې دا پروګرام د دوی لپاره خورا ګټور او اغیزمن تمام شوی او دوی اوس د اداري چارو د ترسره کولو لپاره اړین مهارتونه زده کړي دي.
دا په داسې حال کې ده چې له دې مخکې هم سلګونه مجاهدین د خوست ولایت د تخنیکي او مسلکي زده کړو ادارې له ادارې او مدیریت روزنیز پروګرام څخه فارغ شوي دي.
