د تخنیکي او مسلکي زده کړو اداري سرپرست: د هوټل دارۍ په برخه کې مسلکي ځواک ته اړتیا ده
د تخنیکي او مسلکي زده کړو ادارې سرپرست مولوي غلام حیدر شهامت د مالیې وزارت د دولتي هوټلونو شرکت له مسوولینو سره وکتل.
په دغه کتنه کې د مالیې وزارت د هوټلونو دولتي شرکت عملیاتي مرستیال نصرت الله رحیمي د دغه شرکت د مخینې او فعالیتونو په اړه خبرې وکړې.
ښاغلي رحیمي زیاته کړه چې په هېواد کې د هوټل دارۍ صنعت د مسلکي ځواک له کمښت سره مخ دی.
نوموړي زياته کړه، څرنګه چې د تخنيکي او مسلکي زده کړو اداره د حرفوي ځواک د روزنې دنده پر غاړه لري، نو اړينه ده چې د هوټل دارۍ په برخه کې هم ځواک وروزي.
د دولتي هوټلونو شرکت عملیاتي مرستیال وړاندیز وکړ چې د هوټل دارۍ په برخه کې دې یو انسټیټوټ ایجاد شي.
د تخنيکي او مسلکي زده کړو ادارې سرپرست مولوي غلام حيدر شهامت د دغه وړاندیز هرکلى وکړ او ويې ويل، چې د هوټل دارۍ په برخه کې مسلکي ځواک اړین دی.
ښاغلي شهامت ټینګار وکړ چې د هوټلونو په ګډون ټول کسب او کار باید په هېواد کې معیاري شي. د هغه په وينا، د هوټل دارۍ د صنعت له معياري کېدو سره به د ګرځندوى برخه هم وده وکړي.
د تخنيکي او مسلکي زده کړو ادارې سرپرست وويل، د بشري سرچینو له پلوه د کار بازار د اړتياوو پوره کول د دغه ادارې له موخو څخه دي.
په دغه ناسته کې هوکړه وشوه، چې د هوټل دارۍ په برخه کې به د انسټیټوټ د جوړولو موضوع وڅېړل شي.
ښاغلي شهامت د تخنیکي او مسلکي زده کړو ادارې د پلان او ستراتیژیکې همغږۍ رئیس مولوي نیک محمد نیکمل ته دنده وسپارله چې د هوټل دارۍ په برخه د انسټیټوټ د جوړولو په اړه له دغه ادارې سره د همکارو موسسو سره خبرې وکړي.
