د تخنيکي او مسلکي زده کړو ادارې زده کړیالانو لپاره د قیمتې اسناد چاپ کار زده کړې برنامه پرانيستل شوه!
د تخنیکي او مسلکي زده کړو ادارې د انسټیټوټ میخانیک او بریښنا څانګو زده کړیالانو لپاره د قیمتې اسنادو کار زده کړې پروګرام د مالیې وزارت د خوندې اسنادو چاپ یوه دولتي شرکت لخوا پیل شو.
دغه پروګرام نن د یو لړ مراسمو په ترڅ کې د تخنیکي او مسلکي زده کړو ادارې د رهبري هیئت په حضور درلودلو سره د خوندې اسنادو چاپ دولتی شرکت عمومي رئیس ډاکټر محمد خالد مروان او د یاد وزارت ویاند احمدولي حقمل په ګډون پرانستل شو.
ټاکل شوې چې دغه پروګرام شپږ مياشتې دوام وکړي چې په ترڅ کې به يې د تخنيکي او مسلکي زده کړو ادارې د انسټیټوټ د ميخانيک او برېښنا څانګو زده کړیالانو لپاره د کورنيو او بهرنيو روزونکو له خوا د قیمتې اسنادو چاپ په برخه کې وروزل شي.
د تخنيکي او مسلکي زده کړو ادارې رئيس مولوی غلام حيدر شهامت دغه پروګرام د يادې ادارې د روزنيزو مرکزونو د زده کوونکو لپاره ګټور وباله او هيله يې څرګنده کړه، چې د تخنيکي زده کړو ادارې د روزنيزو مرکزونو فارغين به د ځان بسياينې، د بېوزلۍ د له منځه وړلو او اقتصادي ودې په برخه کې اغېزمن تمام شي.
د تخنيکي او مسلکي زده کړو ادارې مرستيال اسناد نورمحمد عزيزي دغه روزنيز پروګرام د کار موندنې په برخه کې مهم وباله او ويې ويل، چې د تخنيکي او مسلکي زده کړو د زده کوونکو لپاره د کار زده کړې د زمينې د برابرولو په موخه به له نورو وزارتونو او ادارو سره خبرې وکړي.
ښاغلي عزيزي ژمنه وکړه، چي په دولتي بستونو کي به تکړه فارغانو ته د کار زمينه برابره کړي.
د یادولو وړ ده چې د قیمتې اسنادو د چاپ شرکت په هیواد کې یو له مهمو چاپ خونو څخه دی. د ياد شرکت عمومي رئیس ډاکټر محمد خالد مروان وويل، هڅه به وکړي چې په راتلونکي کې د هېواد ټول مهم اسناد په دغه چاپ خونه کې چاپ کړي.
