د تخنیکي او مسلکي زدهکړو ادارې د نشراتو رئیس له ولایتي مسئولینو سره آنلاین ناسته وکړه
د تخنیکي او مسلکي زدهکړو ادارې د نشراتو رئیس، محترم اختر محمد عامر، په یوه انلاین ناسته کې د تخنیکي او مسلکي زدهکړو د زونونو له رئیسانو او د ولایتونو له تخنیکي آمرینو سره وکتل او خبرې یې ورسره وکړې.
د دې ناستې موخه د تخنیکي او مسلکي زدهکړو ادارې او د دې ادارې د دویمو واحدونو ترمنځ د لا ښې همغږۍ پیاوړتیا بلل شوې ده.
د ناستې په پیل کې محترم مولوي عامر د نشراتو ریاست د فعالیتونو او پروګرامونو په اړه معلومات وړاندې کړل او ویې ویل، د دې ریاست د پروګرامونو د پلي کولو په برخه کې د ولایتي مسئولینو همکاري مهمه ده.
ورپسې یو شمېر ولایتي مسئولینو خپلې نظریې، وړاندیزونه او ستونزې د تخنیکي او مسلکي زدهکړو ادارې د نشراتو له رئیس سره شریکې کړې.
په همدې حال کې د نشراتو رئیس د دویمو واحدونو له نشراتي همکاریو څخه د مننې ترڅنګ ټینګار وکړ چې نشرات، معلومات رسول او عامه پوهاوی د ټولو ګډ مسئولیت دی او په دې برخه کې باید همغږي او همکاري لا زیاته شي.
په پای کې د ناستې اړوند نور موضوعات هم مطرح شول او غونډه د خیر په دعا سره پای ته ورسېده.
