د ملکي خدمتونو انسټیټیوټ له لوري په تخنیکي او مسلکي زدهکړو اداره کې د ښوونیزو اړتیاوو ارزونه ترسره شوه
د ملکي خدمتونو انسټیټیوټ له لوري د کارکوونکو د ښوونیزو اړتیاوو د پېژندنې او د بشري سرچینو د ظرفیت لوړونې په موخه، د تخنیکي او مسلکي زدهکړو په اداره کې د ښوونیزو اړتیاوو د ارزونې پروګرام ترسره شو.
په دې پروګرام کې د تخنیکي او مسلکي زدهکړو ادارې کارکوونکو ګډون وکړ او د ښوونیزو اړتیاوو د ارزونې په بهیر کې یې فعاله ونډه واخیسته.
د تخنیکي او مسلکي زدهکړو ادارې د مالي او اداري چارو مرستیال، مفتي فضلالرحمن فاضل، د یاد پروګرام د پرانیستې په مراسمو کې د ملکي خدمتونو انسټیټیوټ د همکاریو او هڅو ستاینه وکړه او د کارکوونکو د ظرفیت لوړونې په برخه کې یې د دې انسټیټیوټ رول ارزښتناک وباله. نوموړي د اداري اړتیاوو سره سم د هدفمندو او اغېزناکو روزنیزو پروګرامونو پر اهمیت ټینګار وکړ.
د مالي او اداري چارو مرستیال زیاته کړه چې اخلاص، رښتینولي او د مسئولیت احساس د اداري چارو د بریالي ترسره کولو اساسي اصول دي، او کارکوونکي باید خپلې سپارل شوې دندې په ژمنتیا، امانتدارۍ او د عبادت په نیت ترسره کړي، ترڅو خلکو ته د اغېزمنو او باکیفیته خدمتونو د وړاندې کولو زمینه برابره شي.
ورپسې، د ملکي خدمتونو انسټیټیوټ رئیس، حافظ اسدالله هارون، وویل چې د دې پروګرام اساسي موخه د کارکوونکو د ښوونیزو اړتیاوو کره پېژندنه ده. نوموړي څرګنده کړه چې د دې اړتیا ارزونې پایلې به د راتلونکو ښوونیزو نصابونو او روزنیزو پروګرامونو د جوړولو بنسټ وګرځي، ترڅو روزنې د ادارو له واقعي اړتیاوو سره سمې طرحه او پلې شي.
د پروګرام په بله برخه کې، د اړتیا ارزونې فورمې د کارکوونکو ترمنځ ووېشل شوې. ګډونوالو د فورمو له ډکولو سره، د دې ډول پروګرامونو هرکلی وکړ او دا یې د مسلکي ظرفیتونو د لوړونې، د اداري خدمتونو د کیفیت د ښه والي او د کاري مهارتونو د پراختیا لپاره یو اغېزمن ګام وباله.
