د تخنیکي زدهکړو د ولایتي مسئولینو د صلاحیتونو ټاکنه او سپارنه
د تخنیکي او مسلکي زدهکړو د زونونو او ولایتونو د تخنیکي آمریتونو د صلاحیتونو او مسئولیتونو د ټاکنې او سپارنې د څرنګوالي په پار د تخنیکي او مسلکي زدهکړو ادارې د رهبرۍ غونډه ترسره شوه.
د غونډې په پیل کې، د تخنیکي او مسلکي زدهکړو ادارې رئیس محترم الحاج مولوي غلام حیدر شهامت د تخنیکي او مسلکي زدهکړو د زونونو د رامنځته کېدو د فلسفې په اړه توضیحات وړاندې کړل.
په دې ناسته کې د ادارې د رهبرۍ غړو د چارو د لا ښه والي، د مسؤلیتونو د وېش او د ولایتي مسؤلینو د صلاحیتونو د ټاکنې او تفویض په اړه بحث او د نظرونو تبادله وکړه.
همدارنګه د نن ورځې په غونډه کې مولوي غلام حیدر شهامت د تخنیکي او مسلکي زدهکړو د زونونو د شتون فلسفې ته په اشارې سره وویل چې زونونه باید د تعلیمي نصاب، تجهیزاتو او د کار بازار سره د اړیکو پیاوړتیا ته ځانګړې پاملرنه وکړي.
د دې موضوع اړوند نور موارد هم د تخنیکي او مسلکي زدهکړو ادارې د رهبرۍ په غونډه کې مطرح شول او غونډه د خیر په دعا سره پای ته ورسېده.
