د لغمان ولایت د تخنیکي زدهکړو آمریت او اقتصاد ریاست ترمنځ مشورتي ناسته ترسره شوه
د لغمان ولایت د تخنیکي او مسلکي زدهکړو آمر مفتي ذبیح الله حقاني د لغمان ولایت د اقتصاد رئیس مولوي عطاء الرحمن فاتح سره وکتل.
مفتي ذبیح الله حقاني په پیل کې د تخنیکي او مسلکي زدهکړو پر ارزښت خبرې وکړې او ویې ویل، چې په اوسني وخت کې حرفوي او مسلکي زدهکړې د بېکارۍ د کمولو، د ځوانانو د ظرفیت لوړولو او د ټولنې د اقتصادي ودې لپاره مهم رول لري.
نوموړي زیاته کړه، چې اړینه ده د اقتصاد ریاست او اړوندو موسسو ترمنځ لا زیاتې همغږۍ رامنځته شي، څو د اړتیا پر بنسټ روزنیز پروګرامونه طرحه او عملي شي.
هغه همدارنګه ټینګار وکړ، چې د بازار غوښتنو ته په کتو باید ځوانانو ته داسې مسلکي مهارتونه ورکړل شي، چې له فراغت وروسته وکولای شي په خپله ځان بسیاینې ته ورسېږي او یا هم د کار زمینه ورته برابره شي.
ورپسې د اقتصاد رئیس مولوي عطاء الرحمن فاتح د تخنیکي او مسلکي زدهکړو د سکتور هڅې وستایلې او ویې ویل، چې د مهارت پر بنسټ زدهکړې د اقتصادي پیاوړتیا بنسټ جوړوي. نوموړي ډاډ ورکړ، چې د اقتصاد ریاست به د موسسو سره د همغږۍ له لارې د مسلکي زدهکړو پروژو د جلب او ملاتړ لپاره لازمې هڅې وکړي.
