د تخنیکي او مسلکي زده کړو ادارې اصلاحي غونډه ترسره شوه
د تخنیکي او مسلکي زده کړو ادارې اصلاحي اوونیزه غونډه، د اطلاعاتو او فرهنګ وزارت د علماوو ریاست مسؤل شیخ محمد موسی خان غزنوي په وینا او د دې ادارې د کارمندانو په ګډون ترسره شوه.
شیخ محمد موسی خان غزنوي په دې ښوونیز پروګرام کې د اداري چارو په ترسره کولو کې اخلاصمندۍ او د کارمندانو سره د شفقت کولو په اړه خبرې وکړې.
نوموړي وویل چې د کارمندانو سره درناوی او شفقت، د احترام زیاتیدنې او په اداره کې د چارو په سمه توګه ترسره کیدلو لامل ګرځي همداراز دا یې هم زیاته کړه چې د چارو په ترسره کولو کې اخلاصمندي د هر مومن د بریالیتوب راز دی.
شیخ محمد غزنوي د دې پروګرام له ګډونوالو، په ځانګړې توګه له رییسانو او آمرینو څخه همداراز وغوښتل چې د کارمندانو سره په خپلو کړنو کې له اخلاقو او شفقت څخه کار واخلي او کارونه یې اهل ته وسپاري.
د تخنیکي او مسلکي زده کړو ادارې اصلاحي غونډه هره اونۍ د شنبه په ورځ ترسره کیږي، چې په یادې غونډه کې په بیلابیلو مذهبي، اخلاقي او ټولنیزو موضوعاتو بحث کیږي.
