په میدان وردګو ولایت کې د محبوسینو لپاره د تخنیکي زده کړو د زمینې برابرول
د میدان وردګو ولایت اړوند د تخنیکي او مسلکي زده کړو آمریت مسولین د یاد ولایت محبوسینو لپاره د مبائیل ترمیم لنډ مهاله روزنیز پروګرام په لاره اچولو خبر ورکوي.
د یاد پروګرام د ترسره کولو موخه له بند څخه وروسته د محبوسینو لپاره د کار زمینې برابرول او د نوموړو د اقتصادي وضعیت وده ویل شوې ده.
دغه پروګرام د میدان وردګو ولایت په مرکزي محبس کې د تخنیکي او مسلکي زده کړو ادارې د حرفوي پروګرامونو د سمون ریاست له خوا جوړ شوی، چې ۲۵ تنه محبوسین به ورڅخه ګټه پورته کړي.
دا په داسې حال کې ده چې څه موده وړاندې د تخنیکي او مسلکي زده کړو ادارې د حکومت د رسنیو په مرکز کې د زندانونو چارو د سمون له ادارې سره د ګډو همکاریو تفاهم لیک لاسلیک کړ.
