ښاغلي مولوی غلام سعید احساس د فراه ولایت له مرستیال والي سره وکتل
د تخنیکي او مسلکي زده کړو ادارې د تخنیکي او مسلکی چارو مرستیال مولوي غلام سعید احساس او ورسره مل پلاوي یې د فراه ولایت له مرستیال والي مولوي عبدالکریم جهادیار سره وکتل.
محترم مولوي احساس د فراه ولایت له مرستیال والي سره د ناستې په ترڅ کې د یاد ولایت د تخنیکي او مسلکي زده کړو د مرکزونو ستونزې او ننګونې د مولوي عبدالکریم جهادیار سره شریکې کړې.
نوموړي د تخنيکي او مسلکي زده کړو ادارې په اړه په مفصله توګه توضیحات وړاندې کړل او زياته يې کړه، چې د تخنيکي او مسلکي زده کړو ادارې پلاوي د يوه کال راهیسې د هېواد په بېلابېلو ولايتونو او ولسواليو کې د دې ادارې له ټولو ښوونيزو مرکزونو څخه څارنه کړې ده.
دغه راز د تخنیکي او مسلکي چارو مرستيال په فراه ولايت کې د مجاهدينو د روزنې پر څرنګوالى خبرې وکړې او ويې ويل چې دمجاهدينو دروزنې طرحه له ١٨ مياشتو راپديخوا د پلي کیدو په حال کې ده او یاده طرحه دمجاهدينو لپاره يو زرين چانس دى تر څو هغه مجاهدین چې د اشغال پر محال د خپلو زده کړو څخه بهر پاتې دي خپلو زده کړو ته دوام ورکړي .
په دې غونډه کې په نورو اړوندو مسایلو هم خبرې وشوې او د فراه ولایت مرستیال والي د تخنیکي او مسلکي زده کړو ادارې د پروګرامونو څخه د ملاټر ترڅنګ زیاته کړه چې په دغه ولایت کې به د تخنیکي او مسلکي زده کړو د مرکزونو ستونزو او ننګونو ته رسیدنه وشي.
