د ولایتونو د نظارت مسؤلینو ته د ظرفیت لوړولو پروګرام پای ته ورسېد
د تخنیکي او مسلکي زده کړو ادارې له خوا د ولایتونو د نظارت مسؤلینو ته د ظرفیت لوړولو پروګرام، چې یوه اونۍ مخکې جوړ شوی و، پای ته ورسېد.
د دغه روزنیز پروګرام په پای کې، د تخنیکي او مسلکي زده کړو ادارې د مشرتابه په حضور او وینا سره مراسم جوړ شول.
د دغه مراسمو په پیل کې، ښاغلي ډاکټر محمود عرب د ګډون کوونکو په استازیتوب خبرې وکړې او د ولایتونو د نظارت د غړو ځینې وړاندیزونه او ستونزې یې شریکې کړې.
د مراسمو په دوام کې، د تخنیکي او مسلکي چارو مرستیال، ښاغلي مولوي غلام سعید احساس په خپله وینا کې د نظارت د کارونو په اهمیت ټینګار وکړ او زیاته یې کړه چې د ولایتونو د نظارت غړي مکلف دي چې د ولایتونو د تخنیکي آمریتونو د ټولو چارو نظارت وکړي.
ښاغلي مولوي احساس زیاته کړه چې د نظارت د غړو راپور ورکول په تصمیم نیولو کې اساسي رول لري، باید په دقت او بشپړ شفافیت سره ترسره شي.
همدارنګه په دغه ناسته کې الحاج مولوي غلام حیدر شهامت د تخنیکي او مسلکي زده کړو ادارې سرپرست رئیس هم وینا وکړه، نوموړي په هېواد د ملکیت حس، پرمختګ او آبادۍ ټینګار وکړ.
ښاغلي مولوي غلام حیدر شهامت زیاته کړه چې د نظارت په چارو کې صداقت ډېر اړین دی او مسؤلین باید ورته جدي پاملرنه وکړي.
همدارنګه نوموړي د تخنیکي او مسلکي زده کړو په مرکزونو کې په عملي زده کړو ټینګار وکړ او زیاته یې کړه چې د ولایتونو تخنیکي آمرین باید په ولایتونو کې له بېلابېلو برخو سره د زده کړیالانو د عملي کارونو ترسره کولو لپاره هوکړې وکړي.
دغه مراسم، ګډون کوونکو ته د تصدیق نامو په ورکولو سره پای ته ورسېدل.
