د هرات اسلام قلعه کثیرالرشتوي لېسه په انستیتوت بدلیږي
الحاج مولوي غلام حیدر شهامت چې د تخنیکي او مسلکي زده کړو مرکزونو د څېړلو لپاره هرات ولایت ته سفر کړی، د هرات ولایت، اسلام قلعه کثیرالرشتوي لېسې وضعیت یې و څېړه.
په دغه سفر کې د تعلیمي چارو عمومي رئیس، همدارنګه د تخنیکي چارو مشاور هم حضور درلود، د دغه ښوونیز مرکز عمومي وضعیت و څېړل شو.
ښاغلي مولوي غلام حیدر شهامت د دغه زده کړې مرکز له مسؤلینو سره په ناسته کې د سیمې له مشرانو او ځایي چارواکو سره په همغږی ټینګار وکړ.
په همدې حال کې د سیمې مشران او ځایي چارواکي انستیتوت ته د دغه لېسې د ارتقا غوښتونکي شول. د تخنیکي او مسلکي زده کړو ادارې سرپرست د دغه غوښتنې د پوره کولو د وعدې ترڅنګ په دغه انستیتوت کې د دوه څانګو د فعالیت اجازه ورکړه.
په پلان کې ده چې د دغه پلاوي له لوري د زده کړې نور مرکزونه هم ولیدل شي.
