د هرات له والي سره د تخنیکي او مسلکي زده کړو ادارې سرپرست وکتل
د تخنيکي او مسلکي زده کړو ادارې سرپرست مولوي غلام حيدر شهامت هرات ولايت ته د خپل سفر په ترڅ کې د یاد ولايت له والي شيخ الحديث مولانا نوراحمد اسلام جار سره وکتل.
په دغې کتنه کې ښاغلي شهامت د تخنيکي او مسلکي زده کړو ادارې د فعاليتونو په اړه خبرې وکړې او ويې ويل چې دغه اداره په هرات کې د خپلو فعاليتونو د پراخولو پلان لري.
د هرات والي د تخنيکي او مسلکي زده کړو ادارې د برنامو هرکلى وکړ او له دغې ادارې سره يې د همکارۍ ډاډ ورکړ.
د يادونې وړ ده، چې د تخنيکي او مسلکي زده کړو اداره په پام کې لري چې د هرات په صنعتي ښارګوټي او د هېواد په نورو صنعتي ښارګوټو کې د کار د بازار له اړتيا سره سم د کار ماهر ځواک د روزلو په موخه صنعتي انسټیټونه جوړ کړي.
