د تخنیکي او مسلکي زده کړو ادارې مشرتابه د روسیې د کارپوهانو او ودانېزو چارو وزارت مسؤلینو سره خبرې اترې وکړې
د تخنیکي او مسلکي زده کړو ادارې مشرتابه د روسیې د کارپوهانو او ودانېزو چارو وزارت له مسؤلینو سره مجازي ناسته خبرې اترې وکړې.
غونډه د روسیې د کارپوهانو او ودانېزو چارو وزارت د نړیوالو اړیکو د مشرې اناستازیا میخایلوف په وینا پیل شوه او د روسیې د ساختماني نهادونو ښوونیزې برخې او د تخنیکي او مسلکي زده کړو ادارې ترمنځ د همکارۍ په برخو کې یې خبرې وکړې.
د تخنيکي او مسلکي زده کړو ادارې سرپرست مولوي غلام حيدر شهامت هم د دغې ادارې په اړه خبرې وکړې او د ادارې هغه برخې يې په ګوته کړې، چې همکارۍ ته اړتيا لري.
ښاغلي شهامت د روسیې تېرو همکاریو ته په اشارې سره وویل چې د کابل د تخنیکم انسټیټوټ ودانۍ د روسیې او افغانستان ترمنځ د همکارۍ یوه نمونه ده.
د تخنيکي او مسلکي زده کړو ادارې سرپرست زياته کړه، چې د تخنيکم انسټيټوټ ودانۍ د څو لسيزو جګړو پر مهال ويجاړه شوې او اوس يې بيارغونې ته اړتيا ده.
ښاغلي شهامت د تخنیکي او مسلکي زده کړو ادارې د ساختماني څانګې استادانو د ظرفیت د لوړولو او د دغې ادارې د ښوونیزو مرکزونو د زده کړیالانو او استادانو لپاره د تحصیلي بورسونو د ځانګړې کولو په برخه کې د روسیې د همکارۍ غوښتنه وکړه.
د تخنيکي او مسلکي زده کړو ادارې سرپرست زياته کړه، د افغانستان او روسيې د تخنيکي او مسلکي برخو مسؤلين د تجربو د تبادلې په موخه د يو او بل هېواد لیدنې ته اړتيا لري.
د غونډې په دوام کې د کارپوهانو له ډلې د روسیې د کارپوهانو او ودانېزو چارو وزارت د ښوونیز مرکز مشر الکساندر شالیف، د کلتوري میراثونو د ساتنې د مرکز مشرې میرمن وجینیا میرونوا، د ساختمان مدیریت او ټکنالوژۍانسټیټوټ مشر نیکولای او د سیول انجینرۍ پوهنتون مرستیالې میرمن ویرا گالیشنیکوا خبرې وکړې او یو پرزنټیشن یې وړاندې کړ.
د مسکو د سیول انجینرۍ پوهنتون مرستیالې وویل، چې په دغه پوهنتون کې لېسانس، ماسټري او دوکتورا شامل دي.
نوموړې زیاته کړه، د مسکو د سیول انجینرۍ پوهنتون کولای شي په بېلابېلو برخو کې د تخنیکي او مسلکي زده کړو د مرکزونو د استادانو او زده کړیالانو لپاره روزنیز کورسونه جوړ کړي.
په پای کې د روسیې کارپوهانو او مسؤلینو ژمنه وکړه چې د ظرفیت لوړونې، د تخنیکي او مسلکي زده کړو د مرکزونو د ودانیو د بیارغونې او د تحصیلي بورسونو د ورکړې په برخو کې به د تخنیکي او مسلکي زده کړو د ادارې له غوښتنې سره سم همکاري وکړي.
د روسيې د کارپوهانو او ودانېزو چارو د وزارت د نړيوالو اړيکو مشرې مېرمن اناستازیا میخایلوف د همکارۍ د تحقق لپاره د همغږۍ په اړتيا ټينګار وکړ.
