په کابل ښار کې د تخنیکي او مسلکي زده کړو ادارې له خوا د مبایل رغونې لنډ مهاله حرفوي پروګرام پیل شو
د تخنیکي او مسلکي زده کړو ادارې اړوند د حرفوي پروګرامونو د سمون ریاست د کابل ښار د دیارلسمې حوزې کثیرالرشتوي انسټيټوټ کې د مبایل رغونې لنډ مهاله حرفوي پروګرام پیل کړ.
په دې لنډ مهاله پروګرام کې شاوخوا ۵۰ تنه «حرفهآموز» زده کوونکو ګډون کړی چې نوموړو ته به د دریو میاشتو په ترڅ کې د مبایل رغونې په اړه په عملي او نظري ډول زده کړې وړاندې شي.
د تخنیکي او مسلکي زده کړو ادارې د حرفوي پروګرامونو د سمون ریاست مسوولینو په وینا ددې پروګرام د پیل کولو څخه یې موخه، د ځوانانو لپاره د شغلي او کاري فرصتونو د زمینې برابرول دي.
دا په داسې حال کې ده چې تر دې وړاندې هم د تخنيکي او مسلکي زده کړو ادارې له لنډ مهاله حرفوي پروګرامونو څخه سلګونه محصلين فارغ او دم ګړۍ د کار په بازار کې پر دندو بوخت دي.
