په سرپل ولایت کې د برښنایي وسایلو ترمیم لنډ مهاله حرفوي روزنیز پروګرام پرانیستل شو
د سرپل ولایت د تخنیکي او مسلکي زده کړو آمریت له لوري د یاد ولایت د نفتو او ګازو په انسټيټوټ کې د برښنایي وسایلو د ترمیم لنډمهاله حرفوي روزنیز پروګرام پیل شو.
په دې پروګرام کې ۶۰ تنه محصلین ګډون لري، چې د درېیو میاشتو په موده کې به د برښنايي وسایلو د ترمیمولو په اړه په عملي بڼه روزنه ترلاسه کړي.
د دغه ښوونیز پروګرام د ترسره کولو موخه په هېواد کې د پوهې د کچې لوړول، د کاري فرصتونو رامنځته کول او د بېوزلۍ کمول دي.
دا په داسې حال کې ده چې لنډ مهاله حرفوي پروګرامونه د تخنیکي او مسلکي زده کړو ادارې له بنسټیزو پروګرامونو څخه ګڼل کېږي، چې تر دې مهاله سلګونه کسان له دغو پروګرامونو څخه فارغ شوي او د کار په بازار کې په عملي توګه پر دندو بوخت دي.
