د پکتیا ولایت د کرنې او وترنرۍ انسټیټوټ کرنې څانګې زده کوونکو د جلغوزې د پروسس فابریکې څخه لیدنه وکړه
د پکتیا ولایت د کرنې او وترنرۍ انسټیټوټ د کرنې څانګې دولسم ټولګي زده کوونکو د تخنیکي او مسلکي زده کړو مرکزونو د علمي سفرونو په چوکاټ کې په یاد ولایت کې د رحيم ګردېزي شرکت د جلغوزيو د پروسس فابريکې څخه لیدنه وکړه.
نوموړو په دې علمي سفر کې د خوراکي موادو د پروسس کولو له بېلابېلو برخو سره بلدتیا ترلاسه کړه او د جلغوزیو د پروسس کولو ماشینونو د کار کولو څرنګوالی یې هم په عملی بڼه ولید.
په همدې حال کې د یادې فابریکې مسؤلینو او لارښود استاد زده کوونکو ته د جلغوزې اقتصادي ارزښت په اړه هر اړخیز توضیحات وړاندې کړل.
لارښود استاد د جلغوزې د پروسس فابریکې، اقتصادي اهمیت ته په اشارې سره وویل چې جلغوزې د افغانستان له ارزښتناکه صادراتي محصولاتو څخه ګڼل کېږي ، چې د پروسس وروسته یې کیفیت او قیمت څو چنده لوړیږي.
په همدې حال کې زده کوونکو هم د دې علمي سفر د ترسره کیدو څخه خوښي څرګنده کړه او خپل پوښتنې یې د پروسس د څرنګوالي په اړه له استاد سره شریکې کړې.
