د هرات د ادارې او حسابدارۍ انسټيټوټ د فوټسال تورنمنټ سیالۍ پای ته ورسېدې
د فوټسال تورنمنټ سيالۍ چې د هرات ولایت د ادارې او حسابدارۍ انسټيټوټ د محصلينو ترمنځ په لاره اچول شوې وې، پای ته ورسېدې.
د دغه ټورنمنټ د پای لوبۍ او اختتامیه مراسم د یو شمېر دولتي او خصوصي بنسټونو د مسوولینو په حضور سره ترسره شول.
په دې مراسمو کې ويناوالو د ادارې او حسابدارۍ انسټيټوټ د ځوانانو او محصلينو د ستاينې ترڅنګ یې د ځوانانو پر ملاتړ ټينګار وکړ.
د یادو مراسمو په پای کې د ګلستان شرکت لخوا محصلینو او تکړه لوبغاړو ته جایزې او ډالۍ هم ورکړل شوې.
د تخنيکي او مسلکي زده کړو د مرکزونو مسوولين تل هڅه کوي، چې د زده کوونکو لپاره د مناسب چاپيريال په رامنځته کولو سره د ځوانانو د پرمختګ لپاره زمينه مساعده کړي.
د دغه پروګرام په یوه بله برخه کې د هرات د ادارې او حسابدارۍ انسټيټوټ د فوټسال ټیم محصلینو او لوبغاړو د یوه تمثیلي پروګرام په ترسره کولو سره د افغانستان کرکټ ملي لوبډلې د وروستیو لاسته راوړنو څخه ستاینه وکړه.
