د متعلمینو چارو رئیس د مس عینک د قراردادي شرکت له مرستیالې سره وکتل
د تخنیکي او مسلکي زده کړو ادارې د متعلمینو او محصلینو چارو رئیس مفتي سید احسان الله قاسمي د عینک مسو د قراردادي شرکت له مرستیالې آغلې «جان چي» سره وکتل.
په دې کتنه کې د تخنیکي او مسلکي زده کړو ادارې او قراردادي شرکت ترمنځ د ګډو همکاریو پر بېلابېلو مسایلو او لارو چارو خبرې وشوې.
د عینک د مسو قراردادي شرکت، د یو روزنیز مرکز جوړول چې د افغانستان د کانونو لپاره مسلکي کسان وروزي، مهم بولي.
د قراردادي شرکت مرستیالې څرګنده کړه چې په افغانستان کې مسلکي او تخنیکي کسانو شتون د دغه هېواد د کانونو د استخراج په برخه کې اړین رول لري.
په دغې ناسته کې، د دې شرکت لخوا د تخنیکي او مسلکي زده کړو مرکزونو د فارغانو د جذبولو پر څرنګوالي او همدارنګه د تخنیکي او مسلکي زده کړو مرکزونو د استادانو د روزنې په ګډون په نورو اړوندو مسایلو هم خبرې وشوې.
د ماهر کاري ځواک روزنه د تخنیکي او مسلکي زده کړو ادارې یو له مهمو موخو څخه ده. په تېرو څلورو کلونو کې یادې اداې د کار بازار له اړتيا سره سم د ښوونيزو څانګو په رامنځته کولو کې ښې لاسته راوړنې هم لاسته راوړي دي.
د تخنيکي او مسلکي زده کړو ادارې رهبري هم له دغې ادارې لخوا د ښوونیزو څانګو پر پیاوړي کولو ټينګار کوي.
