د عزیزي بانک له سرپرست سره د ښاغلي مولوي غلام حیدر شهامت لیدنه او خبرې اترې
ښاغلي مولوي غلام حیدر شهامت، د تخنیکي او مسلکي زده کړو ادارې سرپرست، په خپل کاري دفتر کې له ښاغلي احمد خالد حبیبي، د عزیزي بانک له سرپرست او مل پلاوي سره لیدنه او خبرې اترې وکړې.
په دغه ناسته کې مفتي فضل الرحمن فاضل، د تخنیکي او مسلکي زده کړو ادارې، د مالي او اداري چارو مرستیال هم شتون درلود.
دواړو لورو په دغه ناسته کې په ګډو همکاریو بحث او خبرې اترې وکړې.
د تخنیکي او مسلکي زده کړو ادارې سرپرست د عزیزي بانک له مسؤلینو سره په لیدنه کې، د تخنیکي او مسلکي زده کړو ادارې د موخو او پروګرامونو په هکله تشریحات ورکړل.
نوموړي په هېواد کې د حکومت له لوري د بانکي سیستم د قوي کېدلو ستاینه وکړه، ویې ویل: له چور او چپاول څخه د خلکو د پانګې ساتنه د ا.ا.ا له لویو لاسته راوړنو څخه ګڼل کیږي.
همدارنګه، د عزیزي بانک سرپرست، د خصوصي سکتور څخه د ملاتړ په هکله د حکومت هلې ځلې وستایلې.
ښاغلي احمد خالد حبیبي زیاته کړه چې زموږ موخه په هېواد کې د بانکي سیستم قوي کېدل، او خلکو ته خدمت دی.
له بل پلوه په دغه ناسته کې د مالي او اداري چارو مرستیال د دواړو لورو ترمنځ د ګډو مرستو د څرنګوالي په هکله خبرې وکړې. ښاغلي مفتي فاضل په دغه ناسته کې، په هېواد کې د سراسري امنیت راتلو ته په اشارې سره وویل: اوس په هېواد کې د پانګونې فرصت برابر شوی دی.
همدارنګه د عزیزي بانک سرپرست، په دغه ناسته کې له تخنیکي او مسلکي زده کړو ادارې سره د هراړخیزو همکاریو ډاډ ورکړ.
