د جوزجان تخنيکي انسټیټوټ زده کړیالانو په دولتي او خصوصي ادارو کې عملي زده کړي پيل کړي
د جوزجان ولایت تخنیکي انسټیټوټ د بېلابېلو څانګو 40 تنه زده کړیالان د یوې میاشتنۍ عملي زده کړو په موخه دولتي او خصوصي ادارو ته ور وپېژندل شول.
له دې جملې څخه د برښنا او موټرو څانګو زده کړیالانو په برښنا ریاست او یوه خصوصي ورکشاپ کې کار پیل کړ.
دغه راز د ساختماني او جيوډيزې څانګې زده کړیالان ښار جوړونې رياست ته او د نفتو او ګازو څانګې زده کړیالان افغان د ګازو تصدۍ رياست ته ور وپېژندل شول.
د هوکړې له مخې، په هره څانګه کې د ښوونیز مرکز څخه یو څارونکی او د همکارې ادارې څخه یو کنټرولر ټاکل کیږي چې زده کړیالانو ته به لارښوونه کوي.
د تخنیکي او مسلکي زده کړو په مرکزونو کې تر ۶۰٪ زیاتې زده کړې عملي دي. تر څو د دغو مرکزونو فارغان له فراغت وروسته په مستقیم ډول د کار بازار ته جذب شي.
د مسلکي، ماهر او کارپوه ځواک روزنه د تخنیکي او مسلکي زده کړو ادارې یو له اصلي موخو څخه دی.
