د تخنیکي او مسلکی زده کړو ادارې سرپرست ایران ته دعوت شو
د ایران سفارت کلتوري مسؤلینو په کابل کې د تخنیکي او مسلکي زده کړو ادارې له سرپرست الحاج مولوي غلام حیدرشهامت څخه وغوښتل چې ایران ته سفر وکړي.
دغه ناسته چې د تخنیکی او مسلکی زده کړو ادارې د مرستیالانو په حضور کې ترسره شوه، د تخنیکي او مسلکي زده کړو د څرنګوالي په هکله بحث او خبرې اترې وکړې.
د دغه ناستې په پیل کې د تخنیکي او مسلکی زده کړو ادارې سرپرست د دغه ادارې د وضعیت او زده کړې د څانګو په هکله توضېحات ورکړل.
ښاغلي مولوي غلام حیدر شهامت د تخنیکي او مسلکی زده کړو ادارې ستونزو ته په اشارې سره، د ایران هېواد څخه د استادانو د ظرفیت لوړولو، درسي نصاب، کیفیت لوړولو، په ایراني سازمانونو کې د تخنیکي او مسلکی زده کړو ادارې د فارغینو د جذبولو غوښتونکی شو.
د تخنیکی او مسلکي زده کړو ادارې سرپرست د افغانستان له خلکو سره د ایران د اسلامي جمهوریت له نېک نیت څخه قدرداني وکړه، او ویې ویل، چې اوس مهال افغانستان د پرمختګ لپاره د اسلامي هېوادونو همکاریو ته اړتیا لري.
نوموړي زیاته کړه چې د تخنیکی او مسلکی زده کړو اداره د هېواد په اقتصادي پرمختګ او د بېوزلۍ په له منځه وړلو کې مهم رول لري.
الحاج مولوي شهامت د تخنیکي او مسلکی زده کړو ادارې سره د ایران د همکارۍ په څرنګوالي خبرې وکړې، ویې ویل: د نصاب په برخه کې اړتیا ده چې د چارو یو متخصص ټیم افغانستان ته سفر وکړي، همدارنګه څانګې او روزنیزې بستې هم شریکې کړل شي.
همدارنګه نوموړي د دواړو هېوادونو د تخنیکي او مسلکی زده کړو بنسوټونو ترمنځ د تجربو شریکول، د سیمینارونو او ورکشاپونو په جوړولو ټینګار وکړ.
په همدې حال، امیر رضا ادیبي چې د ایران سفارت په استازیتوب سره یې په ناسته کې حضور درلود، د تخنیکي او مسلکی زده کړو ادارې سرپرست د ښو شرایطو او فرصتونو جوړولو لپاره ایران ته دعوت کړ.
ښاغلي ادیبي، د افغانستان اوسني وضعیت ته په کتلو سره وویل چې دغه هېواد اقتصادي پرمختګ ته د رسېدو په موخه شپه او ورځ هلوځلو ته اړتیا لري.
نوموړي د تخنیکي او مسلکی زده کړو ادارې د مشرتابه او کاري ټیم ستاینه وکړه، زیاته یې کړه چې د علمي سازمانونو کامیابي د متخصص او مسلکی ټیم په شتون پورې تړلی دی.
نوموړي ژمنه وکړه، چې په کابل کې د ایران سفارت د دیپلوماتیکو لارو د تخنیکي او مسلکی زده کړو ادارې ټولې غوښتنې د ایران مسؤلینو ته رسوي.
د دغه غونډې په پای کې د ایران سفارت استازو په کابل کې د تخنیکي او مسلکی زده کړو ادارې سره له ناستې خوشالي څرګنده کړه، د همکاریو د زیاتېدلو په هکله یې هم ژمنه وکړه.
