د تخنیکي او مسلکي چارو مرستیال وپېژندل شو
د تخنيکي او مسلکي زده کړو ادارې تخنيکي او مسلکي چارو نوی مرستيال مولوي غلام سعيد احساس د يو لړ مراسمو په ترڅ کې چې د دې ادارې مشرتابه، کارکوونکو او د چارو ادارې چارواکو په کې ګډون کړى و، وپېژندل شو.
په دې مراسمو کې د تخنيکي او مسلکي زده کړو ادارې سرپرست مولوي غلام حيدر شهامت د اوسني نظام تغیر او تبدیل يو اصل وباله او ويې ويل چې له دې کار څخه يې موخه د ښه وضعيت پر لور تګ دي.
ښاغلي شهامت مولوي احساس ته د بریالیتوب هیله وکړه او ویې ویل چې ولس ته خدمت کول ستر مسوولیت دی.
په دې مراسمو کې د چارو ادارې د انسانې سرچینو رئيس مولوي محمد داوود هم حضور درلود او په خپلو خبرو کې يې وويل، چې د افغانستان خلک بايد د اوسني نظام په رامنځته کېدو شکر وباسي.
هغه ټینګار وکړ، چې هرڅوک باید خپله دنده په ښه توګه ترسره کړي او زیاته یې کړه، چې د نظام مشرتابه د حکمونو اطاعت یو اصل وګڼې.
په پاى کې تخنيکي او مسلکي چارو نوی مرستيال مولوي غلام سعيد احساس وويل، چې دى د افغانستان ا.ا مشرتابه د اړتيا پر بنسټ په دې دنده ګمارل شوى دى.
ښاغلي احساس زیاته کړه، هڅه به وکړي چې د تخنیکي او مسلکي زده کړو ادارې د چارواکو او کارکوونکو په مشوره او همکارۍ د خلکو خدمت وکړي.
په دې مراسمو کې پخواني تخنیکي او مسلکي چارو مرستیال استاد نورمحمد عزیزي ته ستاینه وکړه او مراسم د خیر دعا په ویلو سره پای ته ورسېدل.
