د تخنیکي او مسلکي زده کړو ادارې پلاوي ارزګان ولایت ته سفر وکړ
د تخنيکي او مسلکي زده کړو ادارې پلاوي د یادې ادارې د تخنيکي او مسلکي چارو مرستيال محترم مولوي غلام سعيد احساس په مشرۍ ارزګان ولايت ته سفر وکړ.
دغه پلاوي ارزګان ولایت ته د خپل سفر په ترڅ کې په دغه ولایت کې د مرکز کرنې مسلکي لېسې، د چورې ولسوالۍ د کرنې مسلکي لېسې، د خاص ارزګان ولسوالۍ کثیرالرشتوي مسلکي لېسې په ګډون د یاد ولایت د یو شمېر تخنیکي او مسلکي زده کړو د مرکزونو وضعیت څخه څارنه وکړه.
دغه راز د تخنيکي او مسلکي زده کړو ادارې پلاوي د ارزګان ولايت د مجاهدينو د روزنیز پروګرام په ګډون د تخنیکي او مسلکي زده کړو مرکزونو ستونزې او ننګونې له نږدې وکتلې او د دغه مرکز د ستونزو او ننګونو په حل کې يې د همکارۍ ژمنه هم وکړه.
له بلې خوا دغه پلاوي د يادو مرکزونو له مسوولينو وغوښتل چې د محصلينو لپاره د عملي درسونو په برخه کې لا زياتې هڅې وکړي. او د ارزونې په ترڅ کې یې د ښوونیزو مرکزونو مسوولینو ته د چارو د لا ښه والي په موخه لازمې او مسلکي لارښوونې هم وکړې.
