د تخنیکي او مسلکي زده کړو ادارې له مدیریتي ښوونیز پروګرام څخه د مجاهدینو د فراغت لړۍ دوام لري
په میدان وردګو ولایت کې د تخنیکي او مسلکی زده کړو ادارې مسؤلین وایي چې د یاد ولایت اړوند سیدآباد ولسوالۍ د تخنیکي او مسلکي زده کړو مرکزونو څخه د شاوخوا ۶۰ تنه مجاهدینو د فراغت په پار یې فراغت غونډه ترسره کړې ده.
د نوموړو مسؤلینو په وینا، دغه مجاهدین د ادارې او مدیریت په برخه کې د روزنیزو دورو له بشپړولو وروسته د فراغت اسناد ترلاسه کوي.
په همدې مناسبت جوړه شوې غونډه کې د تخنیکي او مسلکي زده کړو آمریت د مسؤلینو ترڅنګ د سیدآباد ولسوالۍ مرستیال او د یادې ولسوالۍ یو شمیر سیمه ییزو چارواکو هم ګډون درلود.
په دې مراسمو کې ویناوالو مجاهدینو ته د تحصلیي او ښوونیز فرصتونو په برابرولو کې د تخنیکي او مسلکي زده کړو ادارې هلې ځلې وستایلې.
دا په داسې حال کې ده چې تر دې مهاله زرګونه کسانو د تخنیکي او مسلکي زده کړو مرکزونو د اداره او مدیریت روزنیز پروګرام څخه د فراغت سندونه ترلاسه کړي دي.
