د تخنیکي او مسلکي زده کړو ادارې له لوري ناشنوایانو «کاڼو» ته د معیاري انسټیټوټ پرانیستل
د تخنیکي او مسلکي زده کړو ادارې، د ترکیې هیواد «تیکا» موسسې سره په همکارۍ، په کابل ښار کې د ناشنوا«کاڼو» وګړو لپاره د غوره زده کړو وړاندې کولو په موخه څلور معیاري ټولګي پرانیستل.
د مالي او اداري چارو مرستیال مفتي فضل الرحمن فاضل د ښوونیزو ټولګیو په پرانیست غونډه کې وویل چې د تخنیکي او مسلکي زده کړو اداره ژمنه ده ترڅو په هېواد کې غوره تخنیکي او مسلکي زده کړو ته زمینه برابره کړي.
د تخنیکي او مسلکي زده کړو ادارې د مالي او اداري چارو مرستیال همداراز د دې ټولګیو د جوړولو او تجهیز کولو په برخه کې د ترکیې هیواد د «تیکا» موسسې له همکارۍ څخه قدرداني وکړه.
په ورته وخت کې په افغانستان کې د ترکیې هیواد سفیر «جنک اونال» په دې مراسمو کې وویل چې افغانستان او ترکیه له ډیرو کلونو راهيسې د دوستۍ او ورورګلوۍ اړیکې لري.
ښاغلي اونال د افغانستان سره په بیلابیلو ډګرونو کې د لا زیاتو همکاریو ډاډ ورکړ.
دغه راز د تیکا موسسې مشر فضل آکن اردوغان، په دې مراسمو کې وویل چې نوموړو د ناشنوایانو «کاڼو» لپاره استندرد او معیاري ټولګي جوړ کړي، او له دې وروسته کاڼه کسان کولای شي مسلکي زده کړې په غوره ډول او د نړیوالو معیارونو سره سم ترلاسه کړي.
د کابل د ناشنوایانو مسلکي انسټیټوټ زده کوونکي هم د ښوونیزو ټولګیو د تجهیز کولو او جوړولو په اړه وايي چې اوس هغوی کولای شي د اړیکو او ژبنیز مهارتونه په سمه توګه زده کړي.
د کابل په ناشنوایانو مسلکي انسټیټوټ کې د ناشنوایانو د غوره زده کړو لپاره په کمپیوټرونو سمبال څلور معیاري ټولګي پرانیستل شول، او همدارنګه ددې انسټیټوټ زده کوونکو د نقاشۍ او خطاطۍ په شمول هنري آثار د درې ورځني نندارتون په ترڅ کې نندارې ته وړاندې شول.
په همدې حال کې، د کابل ولایت د تخنیکي او مسلکي زده کړو آمر وویل چې د کابل ښار د ناشنوایانو مسلکي انسټیټوټ په دوو درسي وختونو کې د شاوخوا ۴۰۰ زده کوونکو ظرفیت لري.
د دې پروګرام په بله برخه کې، د اسلامي ګالري درې ورځنی نندارتون هم پرانستل شو، چې پکې د کابل ښار د ناشنوایانو مسلکي انسټیټوټ د زده کوونکو لخوا د نقاشۍ، خطاطۍ او رسامۍ هنري آثار نندارې ته وړاندې شول.
