د تخنيکي او مسلکي چارو مرستيال پکتيا ولايت ته سفر وکړ
د پکتیا ولایت د تخنیکي او مسلکي زده کړو ادارې د تخنیکي او مسلکي چارو مرستیال مولوي غلام سعید احساس د یوه پلاوي په مشرۍ پکتیا ولایت د تخنیکي او مسلکي زده کړو د مرکزونو د ستونزو د حل په موخه یاد ولایت ته سفر وکړي.
ښاغلي احساس پکتیا ولایت ته د خپل سفر په ترڅ کې د دغه ولایت له والي الحاج محمد دعوت او د یاد ولایت د علماوو شورا له رئیس شیخ صالح محمد فقیر سره جلا جلا وکتل.
ښاغلي احساس د پکتیا ولایت له سیمه ییزو چارواکو سره په لیدنه کې د تخنیکي او مسلکي زده کړو د ادارې موخې او برنامې تشریح کړل.
نوموړي دغه راز له ولایت مقام او علماوو شورا څخه هم له دغې ادارې سره د لا زياتې همکارۍ غوښتنه وکړه.
په دغې کتنه کې د پکتیا والي او د علماوو شورا رئیس په یاد ولایت کې د تخنیکي او مسلکي زده کړو له برنامو څخه د ملاتړ ډاډ ورکړ.
د دغې لیدنې په دوام کې د تخنیکي او مسلکي زده کړو ادارې پلاوي د پکتیا د تخنیکي او مسلکي زده کړو انسټيټوټ د لیلیې وضعیت بررسي کړ.
د تخنيکي او مسلکي زده کړو اداره په پام کې لري چې د تخنيکي او مسلکي مرکزونو د ستونزو د هواري لپاره ټولو ولايتونو ته سفر وکړي.
