د تخنيکي او مسلکي زده کړو ادارې سرپرست د پروان له والي سره وکتل
ښاغلي مولوي غلام حیدر شهامت پروان ولایت ته د خپل سفر په ترڅ کې د پروان له والي مولوي عبدالعلي قدرت الله امیني سره وکتل او خبرې اترې يې ورسره وکړې.
په دغې کتنه کې دواړو لورو په هېواد کې د تخنیکي او مسلکي زده کړو د اهمیت په ګډون پر بېلابېلو موضوعاتو خبرې وکړې.
په پيل کې د تخنيکي او مسلکي زده کړو ادارې سرپرست د هېواد د اقتصادي ودې او پراختيا په برخه کې د دغې ادارې اهميت او موقعيت بيان کړ او ويې ويل چې د بېوزلۍ له منځه وړل او د کار بازار لپاره د ماهر او مسلکي ځواک روزل د دغې ادارې له اصلي موخو څځه دي.
ښاغلي مولوي شهامت د تخنيکي او مسلکي زده کړو ادارې لاسته راوړنو او پلانونو ته په اشارې سره وویل: د تخنيکي او مسلکي زده کړو ادارې د مجاهدينو لپاره روزنيزه طرحه جوړه کړې دی چې په تطبيق سره يې د مجاهدينو ته د عصري زده کړو زمینه برابره شي.
په ورته وخت کې د پروان والي یاد ولایت ته د تخنیکي او مسلکي زده کړو ادارې سرپرست او ورسره مل پلاوي د سفر قدرداني وکړه او د پروان ولایت د تخنیکي او مسلکي زده کړو له مرکزونو سره یې د همکارۍ ډاډ ورکړ.
د پروان والي دغه راز زياته کړه چې د هېواد په اقتصادي وده کې د تخنيکي او مسلکي زده کړو رول مهم دى او له برنامو يې بايد په هره کچه ملاتړ وشي.
دا مهال د تخنیکي او مسلکي زده کړو ادارې پلاوی په پروان ولایت کې دی او په پام کې ده چې نوموړی پلاوی نورو ولایتونو ته هم سفر وکړي.
