د تخار تخنيکي انسټیټوټ د زده کړیالانو خلاقیت او نوښتونو نندارتون ترسره شو
د تخار ولایت تخنیکي او مسلکي انسټیټوټ د زده کړیالانو د خلاقیت او نوښتونو نندارتون ترسره شو.
د تخار ولايت تخنيکي او مسلکي زده کړو آمر انجنير محمد ايفل مبارز د دغه نندارتون د جوړولو موخه د زده کړیالانو هڅونه وبلله.
هغه وايي، د تخار تخنيکي او مسلکي انسټيټوټ زده کړیالان بې سارې استعدادونه لري او که په کافي اندازه امکانات او تجهيزات ورته برابر شي، کولاى شي لا نوښتونه نندارې ته وړاندې کړي.
حيات الله د تخنيکي او مسلکي انسټیټوټ يو له هغو نوښتګرو زده کړیالانو څخه دی چې په کمو امکاناتو سره يې د "جيپ آهو" ډوله موټر جوړ کړ.
د دغه موټر په جوړولو شپږ میاشتې وخت نیولی او ۴۰۰ زره افغانۍ لګښت پرې راغلی.
