د امارتي او خصوصي سکتور سره د تخنیکي او مسلکي زده کړو ادارې د ګډو کړنلارو د تطبیق ورکشاپ تر سره شو
تخنیکي او مسلکي زده کړو ادارې د امارتي او خصوصي سکتور او ددې ادارې ترمنځ د ګډو همغږیو د رامینځته کولو لپاره " د امارتي او خصوصي سکتور سره د تخنیکي او مسلکي زده کړو ادارې د ګډو کړنلارو د تطبیق ورکشاپ " تر سرلیک لاندې دوه ورځنی ورکشاپ ترسره کړ.
د دې ورکشاپ د ترسره کولو موخه د تخنیکي او مسلکي زده کړو ادارې، امارتي او خصوصي سکتورونو ترمنځ د همغږۍ پیاوړتیا او د کار بازار اړتیاوو سره سم د تخنیکي او مسلکي زده کړو تطبیق کول دي.
د دې ورکشاپ په پرانیست غونډه کې، د تخنیکي او مسلکي زده کړو ادارې د محترم مشرتابه ترڅنګ، د صنعت او سوداګرۍ وزارت، د کار او ټولنیزو چارو وزارت، د کانونو او پټرولیم وزارت او د خصوصي سکتور استازو په شمول د بیلابیلو امارتي ارګانونو یو شمیر استازو هم ګډون درلود.
د تخنیکي او مسلکي چارو مرستیال ښاغلي مولوي غلام سعید احساس د ورکشاپ په پرانیست غونډه کې د وینا پر مهال وویل؛ چې دا اداره هڅه کوي ترڅو د کار بازار د اړتیاوو او ننګونو پر بنسټ ماهر او مسلکي کاري ځواک وروزي.
همداراز نوموړي د تخنیکي او مسلکي زده کړو ادارې سل کلنې مخینې ته په اشارې سره زیاته کړه چې د ماهر کاري ځواک روزنه د دې ادارې یو له اساسي رسالتونو څخه دی او موږ به دا رسالت په پوره اخلاص او ښه نیت سره تعقیب کړو.
په دوام کې د څیړنې او نوښت رئیس مفتي سید محسن سادات هم د هیواد په اقتصادي وده او پرمختګ کې د تخنیکي او مسلکي زده کړو اهمیت ته اشاره وکړه او ویې ویل؛ د تخنیکي او مسلکي زده کړو اداره ژمنه ده چې د امارتي او خصوصي سکتور په پوره همغږۍ سره په بیلابیلو تخنیکي برخو کې ماهر او متخصص کاري ځواک وروزي.
په ورته وخت کې، د صنعت او سوداګرۍ وزارت سلاکار عبدالرحمن الهي د دې ورکشاپ له ترسره کیدو څخه خوښي څرګنده کړه او زیاته یې کړه چې؛ د صنعت او سوداګرۍ وزارت چمتو دی ترڅو د کار بازار تحلیل او د ښوونیزو مرکزونو جوړولو په ګډون په بیلابیلو تخنیکي برخو کې له دې ادارې سره همکاري وکړي.
د یاد ورکشاپ په یوه بله برخه کې، د تخنیکي او مسلکي زده کړو ادارې کارپوهانو د دې پروګرام ګډونوالو ته پریزنټیشن هم وړاندې کړ او همدارنګه هغوی د ګدو همغږیو په موخه د تجربیاتو د شریکولو په پار جلا ډلو باندې وویشل شول.
دا ورکشاپ په داسې حال کې ترسره کیږي چې د تخنیکي او مسلکي زده کړو ادارې تر دې وړاندې هم د کابل ښار په انټرکانټینینټل هوټل کې د دې ادارې، امارتي او خصوصي سکتوونو ترمنځ د همغږۍ رامینځته کولو لپاره ورته ورکشاپ، ترسره کړی و.
