په میدان وردګ ولایت کې دمجاهدینو د تعلیمي سویې د تثبیت آزموینه واخیستل شوه
د میدان وردګ ولایت د تخنیکي او مسلکي زده کړو آمریت چارواکي په یاد ولایت کې د مجاهدینو لپاره د تعلیمي سویې د تثبیت آزموینې د پیل خبر ورکوي.
د پروګرام په افتتاحیه مراسمو کې د میدان وردګ ولایت سیمه ییزو چارواکو او مشرانو هم حضور درلود.
د دوی په خبره، په دې پروګرام کې شاوخوا ۴۳۰ تنو مجاهدینو ګډون کړی و او ټاکل شوي چې د تعلیمي سویې د تثبیت وروسته به د میدان وردګ ولایت د تخنیکي او مسلکي زده کړو په مرکزونو کې د اداري او مدیریت په برخه کې زده کړې وکړي.
دا په داسې حال کې ده، چې له دې وړاندې هم د میدان وردګ ولایت د تخنیکي زده کړو مرکزونه د مجاهدینو لپاره د ښوونیزو ټولګیو د پیل شاهدان وو، چې په نوموړو ټولګیو کې د ادارې او مدیریت پروګرامونه تدریس کیږي.
د مجاهدینو د روزنیزې طرحې پر بنسټ چې د تخنیکي او مسلکي زده کړو ادارې لخوا چمتو شوې او د ریاست الوزرا د مقام لخوا منظور شوې؛ مجاهدين په ټول هېواد کې د تعليمي سویې له تثبیت وروسته د تخنيکي او مسلکي زده کړو په مرکزونو کې د زده کړو په موخه شاملېږي.
