د تخنيکي او مسلکي زده کړو ادارې سرپرست بغلان ولايت ته سفر وکړ
د تخنيکي او مسلکي زده کړو ادارې سرپرست مولوي غلام حيدر شهامت د يوه پلاوي په مشرۍ بغلان ولايت ته سفر وکړ.
د دغه سفر موخه د یاد ولایت د تخنیکي او مسلکي زده کړو د مرکزونو د ستونزو هوارول دي.
نوموړي پلاوي په بغلان ولایت کې د یو شمېر تخنیکي او مسلکي زده کړو د مرکزونو وضعیت بررسي کړ او د دغو مرکزونو ستونزې یې واورېدې.
په دوام کې مولوي غلام حیدر شهامت بغلان ولایت ته د خپل سفر په ترڅ کې د بغلان له والي مولوي عبدالرحمن حقاني او د یاد ولایت د علماوو شورا له رئیس شیخ کمال الدین سره وکتل.
ښاغلي شهامت د بغلان له والي سره په کتنه کې د تخنيکي او مسلکي زده کړو د ادارې موخو او برنامو په اړه توضیحات ورکړل او ويې ويل چې دغې ادارې داسې طرحه جوړ کړى چې پر بنسټ به يې مجاهدینو ته د تخنيکي او مسلکي زده کړو په مرکزونو کې د عصري علومو زده کړو زمینه برابره شي.
ښاغلي مولوي شهامت دغه راز زياته کړه، چې د تخنيکي او مسلکي زده کړو ادارې د نوښت مرکز د نوښتګرو کسانو د ملاتړ په موخه جوړ کړى او تر اوسه په دې مرکز کې لسګونه پروژې ثبت شوې دي.
نوموړي د هغه سپورتي موټر چې قطر نندارتون ته یې لاره پیدا کړې په اشارې سره زياته کړه، چې دغه موټر د تخنيکي او مسلکي زده کړو ادارې د نوښت په مرکز کې ډيزاين او جوړ شوى دى.
د تخنيکي او مسلکي زده کړو ادارې سرپرست زياته کړه، چې دغه اداره د کار بازار لپاره د ماهر او مسلکي ځواک د روزلو له لارې د هېواد په اقتصادي وده او پر ځان بسياينې کې مهم رول لوبوي.
له بل پلوه د بغلان والي مولوي عبدالرحمن حقاني او د دغه ولایت د علماوو شورا رئیس شیخ کمال الدین د مجاهدینو د روزنیزې طرحې هرکلی وکړ او د تطبیق په برخه کې یې د همکارۍ ژمنه وکړه.
د تخنيکي او مسلکي زده کړو ادارې پلاوي دغه سفر له بغلان ولايت څخه پيل شوى او ټاکل شوې ده چې نورو ولايتونو ته هم سفر وکړي.
تر دې مخکې هم د تخنيکي او مسلکي چارو مرستيال مولوي غلام سعيد احساس د يوه پلاوي په مشرۍ د تخنيکي او مسلکي زده کړو د مرکزونو د ستونزو د هواري په موخه يو شمېر ولايتونو ته سفرونه کړي دي.
