د میدان وردګو ولایت دایمیرداد کثیرالرشتوي انسټیټوټ کې د محصلینو د عملي زده کړو څرنګوالی
د میدان وردګو ولایت دایمیرداد کثیرالرشتوي انسټیټوټ د ساختماني څانګې محصلینو د تخنیکي او مسلکي زده کړو ادارې د عملي زده کړو په چوکاټ کې د یوې درسي جلسې په ترڅ کې د ساختماني چارو په اړه په عملي بڼه روزنه ترلاسه کړه.
د دې درسي جلسې په جریان کې، لارښود استاد محصلینو ته د ګول سیخونو، قالب بندۍ او د ساختمان د سیخبندۍ لپاره د اړتیا وړ موادو په اړه توضیحات ورکړل.
نوموړي دغه راز د ساختمان د سیخبندۍ په اړه وضاحت ورکړ چې؛ هغه سیخونه چې د ودانۍ په سیخبندۍ کې کارول کیږي باید ځانګړي او مهندسي شوي ځانګړتیاوې ولري ترڅو د ودانۍ ځواک، دوام او خوندیتوب ډاډمن شي.
په دوام کې، محصلینو هم خپلې پوښتنې او سوالونه له لارښود استاد سره شریکې کړې او د استاد له لوري د هغو پوښتنو ته جامع ځوابونه هم ورکړل شول.
د تخنیکي او مسلکي زده کړو په مرکزونو کې د زده کړو لویه برخه عملي ده، له همدې امله د تخنیکي او مسلکي زده کړو مرکزونو فارغان د فراغت وروسته په مستقیم ډول د کار بازار ته جذب کیږي.
