د دشت برچي د ادارې او اقتصاد انسټیټوټ ستونزې وڅېړل شوې
د تخنيکي او مسلکي زده کړو ادارې مشر مولوی غلام حيدر شهامت د دشت برچي د اداري او اقتصاد د انسټیټوټ د ستونزو د څيړلو په موخه له ياد انسټیټوټ څخه ليدنه وکړه.
د برچي ادارې او اقتصاد انسټیټیوټ امر او استادانو د اوبو کمښت، د شنو خونو نشتوالی، د انستیتیوت د انګړ د پاخه کولو اړتیا او د امنیتي ساتونکو لپاره د خونو نشتوالی د دغه روزنیز مرکز له ننګونو او اړتیاوو څخه یاد کړل.
د تخنيکي او مسلکي زده کړو ادارې رئيس هم د درسي ټولګيو ارزونه وکړه او د زده کوونکو ستونزې يې واوريدې.
ښاغلي شهامت په ټولګي کې زده کوونکو ته په خطاب کې وویل: هغه څه چې انسان خپلې موخې ته رسوي علم دی. "دا د علم روښانتیا دی چې لاره ټاکي."
هغه زياته کړه، چې د تخنيکي او مسلکي زده کړو ادارې د روزنيزو مرکزونو زده کوونکي د علم سربیره د هنر په زده کولو بوخت دی.
د تخنيکي او مسلکي زده کړو ادارې رئيس وويل، چې د دې ادارې د روزنيزو مرکزونو فارغان په مستقيم ډول د کار بازار کې جذب کیږی.
هغه ژمنه وکړه چې کار د چمتو کولو لپاره به هڅه کوی او زیاته یې کړه چې په دې برخه کې یې اقدامات کړي دي.
د ادارې او اقتصاد انسټیټوټ زده کړیالانو خپلې ستونزې مطرح کړې او د یوه مجهز کمپیوټرلب او کتابتون د جوړولو غوښتنه یې وکړه.
د تخنيکي او مسلکي زده کړو ادارې رئيس ژمنه وکړه، چې ټولې ستونزې به د دې ادارې د وړتیا او اسانتياو له مخې حل کړي.
د یادولو وړ ده چې د دې لیدنې په ترڅ کې ښاغلي شهامت عصمت الله پایور د دشت برچي ادارې او اقتصاد انستیتیوت نوي امر په صفت معرفي او په کار یې پیل وکړ.
د تخنيکي او مسلکي ادارې رئيس د دشت برچي د اداري او اقتصاد انسټیټوټ د پخواني امر قربانعلی محمدي لاسته راوړنو ستاينه وکړه.
