د تخنیکي او مسلکي زدهکړو مرکزونو د تعلیمي نصاب بیا کتنه او اعتبار ورکول
د تخنیکي او مسلکي زدهکړو مرکزونو د تعلیمي نصاب د بیا کتنې، پراختیا او اعتبار ورکولو په موخه د تخنیکي او مسلکي زدهکړو ادارې یو ورکشاپ جوړ کړ.
د تعلیمي نصاب ریاست مسئولین وایي، ټاکل شوې چې د دې ورکشاپ په ترڅ کې د ټکنالوژۍ، ودانیزو چارو، ځانګړو زدهکړو، اقتصاد او مدیریت په ګډون د بېلابېلو څانګو تعلیمي نصابونه بیا وکتل شي.
په دې پروګرام کې د بېلابېلو ادارو متخصصین، کارپوهان او د پوهنتونونو استادان ګډون لري.
د تخنیکي او مسلکي چارو مرستیال، محترم مولوي غلام سعید احساس، د دې دېرش ورځني ورکشاپ د پرانیستې په مراسمو کې وویل، د تعلیمي نصاب ترتیب، تدوین، بیا کتنه او پراختیا د زدهکړو د کیفیت په لوړولو کې بنسټیز ارزښت لري.
نوموړي څرګنده کړه چې متخصصین او د پوهنتونونو استادان باید د تعلیمي نصاب د جوړولو او بیا کتنې پر مهال کلتوري، اخلاقي، شرعي او اسلامي ارزښتونو ته ځانګړې پاملرنه وکړي.
محترم مولوي غلام سعید احساس همدارنګه ټینګار وکړ چې د خصوصي سکټور او د کار بازار اړتیاوې باید د تخنیکي او مسلکي زدهکړو د مرکزونو په تعلیمي نصاب کې په پام کې ونیول شي.
د تخنیکي او مسلکي چارو مرستیال له ګډونوالو وغوښتل چې د تعلیمي نصاب د بیا کتنې او پراختیا لپاره له خپلو علمي وړتیاوو څخه بشپړه ګټه واخلي او د هېواد د علمي ټولنې د خدمت لپاره خپلې هڅې لا پیاوړې کړي.
په همدې حال کې د تخنیکي او مسلکي زدهکړو ادارې د تعلیمي نصاب رئیس هم د ځوان نسل په روزنه کې د تعلیمي نصاب ارزښت مهم وباله او له ګډونوالو یې وغوښتل چې په دې برخه کې له ادارې سره هر اړخیزه همکاري وکړي.
د یادونې وړ ده چې د تخنیکي او مسلکي زدهکړو ادارې مشرتابه تل هڅه کوي، څو د پوهنتونونو د استادانو، متخصصینو، کارپوهانو او د خصوصي سکټور د استازو له نظرونو څخه په ګټې اخیستنې، تعلیمي نصابونه د اسلامي ارزښتونو، د ټولنې اړتیاوو او علمي او تخنیکي پرمختګونو له غوښتنو سره سم بیا و ارزوي او اعتبار ورکړي.
