د تخنيکي او مسلکي چارو مرستيال د خوست له مرستيال والي سره وکتل
د تخنيکي او مسلکي زده کړو ادارې د تخنيکي او مسلکي چارو مرستيال مولوي غلام سعيد احساس د خوست له مرستيال والي مولوي محبوب شاه قانت سره وکتل.
په دغې کتنه کې ښاغلي احساس لومړی د خوست د خلکو د مېلمه پالنې قدرداني وکړه او ويې ويل چې د یاد ولايت خلک دین دوسته او مجاهدپاله دي.
نوموړي د غونډې په دوام کې د تخنيکي او مسلکي زده کړو ادارې پر اهميت او په خوست کې د تخنيکي او مسلکي زده کړو د مرکزونو د ستونزو په اړه خبرې وکړې.
ښاغلي احساس د اسلامي امارت د مجاهدینو لپاره د زده کړو د زمینې په اړه هم خبرې وکړې او ویې ویل چې د تخنیکي او مسلکي زده کړو ادارې په دې برخه کې طرحه چمتو کړی ده.
د خوست مرستيال والي د مجاهدينو د روزنې په برخه کې د تخنيکي او مسلکي زده کړو ادارې د طرحې هرکلى وکړ او له دغې ادارې سره يې د بشپړې همکارۍ ژمنه وکړه.
د يادونې وړ ده، چې د تخنيکي او مسلکي زده کړو ادارې د تخنيکي او مسلکي چارو مرستيال د خوست ولایت تخنيکي او مسلکي زده کړو د مرکزونو د څارنې او بررسي په موخه یاد ولايت ته سفر کړى ده.
