د تخنیکي او مسلکي زده کړو د ولایتي آمریتونو له آمرینو او مسؤلینو سره د تخنیکي او مسلکي زده کړو ادارې رهبرۍ آنلاین غونډه ترسره شوه
د تخنیکي او مسلکي زده کړو ادارې رئیس محترم الحاج مولوي غلام حیدر شهامت د دې ادارې اړوند ښوونیز مرکزونو کې د فعالیتونو د ښه والي په موخه، د ولایتي آمرینو او مسؤلینو سره آنلاین غونډه ترسره کړه.
په دې غونډه کې د الحاج مولوي غلام حیدر شهامت ترڅنګ د مالي او اداري چارو مرستیال مفتي فضل الرحمن فاضل او همدارنګه د دې ادارې د بیلابیلو څانګو رئیسانو هم ګډون درلود.
الحاج مولوي غلام حیدر شهامت د تخنیکي او مسلکي زده کړو له آمرینو سره په آنلاین غونډه کې وویل چې د تخنیکي او مسلکي زده کړو مرکزونو ولایتي مسؤلین باید د تدریسي چارو غوره والي ته په جدي بڼه پاملرنه وکړي.
نوموړي همداراز د تخنیکي او مسلکي زده کړو مرکزونو مسؤلینو ته په خطاب سره وویل چې باید د مأمورینو د ګمارنې په برخه کې د هغوي د وړتیاوو اصل ته زیاته پاملرنه وکړي.
په ورته وخت کې، ښاغلي مولوي شهامت زیاته کړه چې د تخنیکي او مسلکي زده کړو په اداره کې د تدریسي چارو څخه د څارنې برخه له خورا لوړ ارزښت څخه برخمنه ده او دغه څانګه باید لا زیاد فعالیت ترسره کړي.
د تخنیکي او مسلکي زده کړو ادارې محترم رئیس د تخنیکي زده کړو له آمرینو سره د غونډې په دوام کې ټینګار وکړ چې کار باید خپل اهل او د کار وړ کس ته وسپارل شي.
د دې غونډې په پای کې، ښاغلي الحاج مولوي شهامت دغهراز مسؤلینو ته د چارو د ښه والي په موخه اړینې لارښوونې وکړې او ټینګار یې وکړ چې د چارو په ترسره کولو کې روڼتیا او صداقت خورا اړین دي.
