د تخنیکي او مسلکي زده کړو ادارې د املاکو ننګونې د عدليې وزارت مرستیال په حضور کې و څیړل شوي
د تخنیکي او مسلکي زده کړو ادارې مشرتابه ددې ادارې املاکو ننګونو په موخه د عدليې وزارت مرستیال شیخ عبدالکریم حیدر سره غونډه ترسره کړه.
په دې کتنه کې د تخنیکي او مسلکي زده کړو ادارې د املاکو او خدماتو رئیس مفتي سید محسن سادات چې د پوهنې وزارت استازو هم حضور درلود، د دغه ادارې د املاکو ننګونو په اړه خبرې وکړې. ښاغلي سادات وویل چې د دغه ادارې ملکیتونو یوه برخه تر اوسه د پوهنې وزارت په واک کې ده.
د تخنيکي او مسلکي زده کړو ادارې سرپرست مولوي غلام حيدر شهامت هم په دې برخه کې څرګندونې وکړې او ويې ويل، چې دغه اداره خپلو ملکيتونو ته اړتيا لري.
د پوهنې وزارت استازو هم د دعوی لاندې ملکیتونو په اړه خبرې وکړې او په پای کې د عدلیې وزارت مسلکي مرستیال شیخ عبدالکریم حیدر وویل، چې د وروستۍ پرېکړې لپاره باید د تر پوښتنې لاندې ملکیتونو اسناد وڅېړل شي.
