د عملي زدهکړو پیاوړتیا لپاره د همکارۍ هوکړهلیک لاسلیک شو
د خوست ولایت مرکز کثیرالرشتوي انسټیټیوټ د کمپیوټر ساینس څانګې محصلینو ته د عملي زدهکړو (پراکتیک) د زمینې برابرولو په موخه له افغان تیلي کام مخابراتي شرکت سره د همکارۍ هوکړهلیک لاسلیک کړ.
د دې هوکړهلیک له مخې، محصلین به د خپلې عملي دورې پر مهال د یاد شرکت په بېلابېلو تخنیکي څانګو کې عملي روزنه ترلاسه کړي، څو خپلې نظري زدهکړې په عملي بڼه هم پیاوړې کړي.
زدهکوونکي وایي چې د عملي زدهکړو فرصتونو برابرول د هغوی د مسلکي مهارتونو په لوړولو، کاري تجربې ترلاسه کولو او راتلونکي کې د کار بازار ته د لا ښه چمتووالي لپاره یو مهم ګام دی.
هغوی همدارنګه د تخنیکي او مسلکي زدهکړو د مرکزونو زدهکوونکو لپاره د عملي زدهکړو د لا پیاوړتیا غوښتنه وکړه.
د تخنیکي او مسلکي زدهکړو په مرکزونو کې د زدهکړو ډېره برخه عملي ده، له همدې امله زدهکوونکي له فراغت وروسته په اسانۍ سره په کاري بازار کې د کار خاوندان شي.
