دمیلاد النبي به مناسبت د تخنیکي او مسلکي زده کړو ادارې دمشرتابه پیغام
الحمدلله رب العالمین والصلاة والسلام علی رسول الله صلی علیه وسلم أشرفهم نسباً و أکملهم جمالاً وأعظمهم خُلقاً (وانک لعلی خلق عظیم)
(وَمَا أَرسَلنَاک إلا رَحمَةً لِلعَالَمين) (يَا أَيُّهَا النَّبيُّ إنَّا أَرسَلنَاک شَاهِدًا وَمُبَشِّرًا وَنَذِيرًا) (وَدَاعيًا إِلَى اللَّهِ بإذنِهِ وَسرَاجًا مُنيرًا) (بالمُؤمنينَ رَءُوف رَحِيم).
وبعد: د افغانستان غيورو او متدينو ولسونو!
تاسو پوهېږی نن د اسلام ستر پیغمبر حضرت محمد (صلی الله علیه وسلم) د نیکمرغه میلاد ورځ ده، دا د هغه ستر شخصیت میلاد دی، چې دنيا ته په راتګ يې ځمکه او اسمانونه رڼا شول، د عربي جزیرې له غباره ډک اسمان یې د لمر په شان رڼا کړ، نړۍ او بشريت ته یې روښنايي ورکړه، د جاهلیت د دورې د خلکو ژوند يې د جهالت له تورو تیارو او ګمراهۍ وژغورو، خلک يې د تيارو څخه د رڼا په لور را وبلل، نن د هغه شخصیت د ميلاد ورځ ده چې د هر ډول ښکلا، فضيلت، كرامت، او ښايست لرونکی دی، نن د هغه شخصیت د ميلاد ورځ ده چې د ټولو صفاتو له ليکلو يې قلم عاجز دی، نن د هغه شخصیت د ميلاد ورځ ده چې پر مؤمنانو ډیر نرمي کوونکی او ډیر مهربان دی، نن د هغه شخصیت د ميلاد ورځ ده چې شپه او ورځ به د خپل اُمت په غم کې ؤ، د دوی لپاره به ېې په ساعتونو، ساعتونو له دعاګانو، عذر، زارۍ او عاجزۍ سره د الله تعالی په دربار کې د خپل اُمت لپاره د مغفرت او بښنې غوښتنې کولې.
بناء د تخنيکي او مسلکي زده کړو ادارې مشرتابه د دې سپېڅلي میلاد د را رسیدو په مناسبت د نړۍ ټولو مسلمانانو ته په ځانګړې توګه د افغانستان مجاهد، غيور او شهیدپال ملت ته مبارکي وایي، د تخنيکي او مسلکي زده کړو ادارې اړوند ټولو ښوونيزو مراکزو له مسؤلينو غوښتنه کوي چې په ډیر عالي او شانداره توګه د قران کریم په ختمونو او د نبوي سیرت د سیالیو په جوړولو سره د رحمة للعالمین حضرت محمد (صلی الله عليه وسلم) دغه مبارک میلاد ولمانځي او د قولي، فعلي او تقریري سنتو په عملي کولو سره د یو کامل اُمتي عهد تازه او د ژوند ټولې چارې ور سره عيارې او عملي کړي.
په درناوي
مولوي غلام حیدر شهامت
دتخنيکي او مسلکي زده کړو ادارې سرپرست
