د تخنیکي او مسلکي زدهکړو ادارې اصلاحي غونډه ترسره شوه
د تخنیکي او مسلکي زدهکړو ادارې د اصلاحي غونډو په دوام، نن د کابل پوهنتون استاد، محترم نصرمنالله مجاهد، د آخرت لپاره د چمتووالي او د مسلمانانو د دیني مسؤلیتونو په اړه وینا وکړه.
نوموړي وویل، دنیا د الله تعالی د ازموینې ځای دی او مسلمانان باید تل په دې پوه وي چې د خپل ژوند په هر پړاو کې د الله تعالی له لوري ازمویل کېږي. هغه زیاته کړه، مؤمنان باید هېڅکله د الله تعالی له عبادت، ذکر او اطاعت څخه غفلت ونه کړي او خپل دیني مسؤلیتونه په سمه توګه ادا کړي.
استاد مجاهد د خپلو خبرو په ترڅ کې د نېکو ملګرو پر ټاکلو، د قرآن کریم پر دوامدار تلاوت او اسلامي ارزښتونو ته پر ژمنتیا هم ټینګار وکړ.
هغه وویل، له صالحو او نېکو کسانو سره ناسته او ولاړه د ځوانانو د اسلامي اخلاقو په اصلاح او سالمې روزنې کې اغېزناک رول لري، له همدې امله باید ځوانان په دې برخه کې له پوره دقت او پاملرنې څخه کار واخلي.
د غونډې په پای کې استاد نصرمنالله مجاهد وویل، د دنیا ژوند لنډمهالی او تېرېدونکی دی او مؤمنان باید د نېکو اعمالو په ترسره کولو او د آخرت لپاره په چمتووالي سره د ژوند له دې ستر نعمت څخه غوره ګټه پورته کړي.
