زدهکوونکو ته د مهمو اداري موضوعاتو په اړه عملي زدهکړه ورکړل شوه
د لغمان ولایت ادارې او حسابدارۍ انسټیټیوټ زدهکوونکو د یو علمي سفر په ترڅ کې د یاد ولایت ښاروالۍ ته ولاړل او هلته یې د بېلابېلو اداري موضوعاتو په اړه عملي زدهکړه ترلاسه کړه.
لارښود استاد د لغمان ښاروالۍ د مسؤلینو په همکارۍ زدهکوونکو ته د عوایدو راټولولو څرنګوالی، ډولونه، د بودجې تنظیم، مکتوبلیکنه او نور اړوند موضوعات په عملي ډول تشریح کړل.
د دې درسي پروګرام ګډونوال وایي چې عملي زدهکړې د دوی لپاره ډېرې ګټورې دي او د دې ډول برنامو د لا پیاوړتیا غوښتنه کوي.
د تخنیکي او مسلکي زدهکړو په مرکزونو کې د زدهکړو ډېره برخه عملي ده، له همدې امله د دغو مرکزونو فارغان په مستقیم ډول د کار بازار ته جذبېږي.
