د اسلامي امارت سلګونه مجاهدین او نوي ګمارل شوي کارکوونکي له تخنیکي او مسلکي زده کړو فارغ شول
د تخنیکي او مسلکي زده کړو ولایتي آمریتونو په دې وروستیو کې د اسلامي امارت د سلګونو مجاهدینو او نویو ګمارل شویو کارکوونکو لپاره روزنیز کورسونه ترسره کړي دي.
په دغو روزنیزو کورسونو کې د ادارې او مدیریت مهارتونه، د انګلیسي ژبې او کمپیوټر په برخه کې د تخنیکي او مسلکي زده کړو د مرکزونو د تجربه لرونکو استادانو له خوا په نظري او عملي ډول تدریس شوي.
د دې روزنیزو کورسونو موده له 45 ورځو څخه تر دریو میاشتو پورې وه.
تر دې دمه د اسلامي امارت سلګونه مجاهدین او نوي ګمارل شوي کارکوونکي د تخنیکي او مسلکي زده کړو له مرکزونو او د ظرفیت لوړونې له روزنیزو کورسونو فارغ شوي دي.
د تلې میاشتې په پای کې په سرپل ولایت کې 150 تنه نوي ګمارل شوي کارکوونکي او د اسلامي امارت د مجاهدینو له ۴۵ ورځني روزنیز کورس څخه د فراغت تصدیق پاڼې ترلاسه کړی.
همدارنګه د تلې په میاشتې کې د بغلان ولایت د تخنیکي او مسلکي زده کړو آمریت د 50 تنه نویو ګمارل شویو کارکوونکو او د اسلامي امارت مجاهدینو ته ۴۵ ورځنی روزنیز کورس ترسره کړ.
همدا راز د تلې میاشتې په پیل کې د پروان ولایت د تخنیکي او مسلکي زده کړو آمریت له خوا د نویو ګمارل شویو کارکوونکو لپاره د ظرفیت لوړونې درې میاشتنی روزنیز کورس ترسره شو.
په ځینو ولایتونو کې د اسلامي امارت د نویو ګمارل شویو کارکوونکو او مجاهدینو لپاره د ظرفیت لوړونې څو دورې په لاره اچول شوي وی. چې له دې جملې څخه په بلخ او میدان وردګو ولایتونو کې د ښوونیزو پروګرامونو دوه دورې ترسره شوې دي.
د ظرفیت لوړونې پروګرام تر دې مهاله په کندهار، هلمند او دایکندي ولایتونو کې ترسره شوی دی.
د تخنیکي او مسلکي زده کړو اداره، د هېواد یو له مهمو تعلیمي او تحصیلي بنسټونو څخه دی، چې د ماهرو کاري ځواک روزنه یې له مهمو موخو څخه ګڼل کېږي.
