د پروان ولایت د مجاهدینو لپاره د ادارې او مدیریت د روزنیز پروګرام پیل
د پروان ولایت د تخنیکي او مسلکي زده کړو آمریت د یاد ولایت په مرکز کې د کثیرالرشتوي په انستیتوت کې د مجاهدینو د روزنیز پروګرام د جوړېدو خبر ورکوي.
په دې پروګرام کې د پروان ولايت سيمه ييزو مسوولينو هم ګډون کړى و او ويناوې يې وکړې.
په دې غونډه کې د پروان ولایت د والي مرستیال محمد ادریس انوري په خپلو ویناوو کې د تخنیکي او مسلکي زده کړو له ادارې څخه مننه وکړه چې مجاهدینو لپاره یې د زده کړو د دوام زمینه برابره کړې ده.
هغه وویل چې مجاهدین باید له دې فرصت څخه ګټه پورته کړي او تل په ټولګي کې حضور ولري. ښاغلي انوري دا هم وویل چې د مجاهدینو روزنه د ادارې په اصلاح کې مهم رول لري.
د دغه پروګرام په دوام کې د تخنيکي او مسلکي زده کړو آمر مولوي محمدزي رسولي خبرې وکړې. نوموړي وویل چې د تخنیکي او مسلکي زده کړو اداره د مجاهدینو ملاتړ ته ژمنه ده .
محترم مولوي محمدزي څرګنده کړه، هغه مجاهدینو چې د ادارې او مدیریت په روزنیزو پروګرامونو کې ګډون کړی باید له اصولو سره سم په ټولګي کې حاضر وي او له دې فرصت څخه سمه ګټه پورته کړي.
مخکې هم د پروان ولایت د تخنیکي زده کړو آمریت د سویې د مالومولو په موخه په یاد پروګرام کې د شاوخوا زرو تنو مجاهدینو د ګډون اعلان کړی و.
